Home 香港買車養車TIPS 我的日本第一次:二手水貨車購買經驗分享

我的日本第一次:二手水貨車購買經驗分享

by Buffalo

相信想買人生第一部車,又或者想換車既讀者朋友,都曾經考慮過買日本水貨車。而小編都一樣,係買人生第一部車既時候,都有好多好多既考慮。會考慮買行貨新車有保養,易維修易搵零件好,定係買架水貨車,與眾不同,揸出街回頭率高好。係尋找緊車款既時候,小編考慮既都係日本車,因為平、抵玩。當小編開始不斷搵心頭好既時候,發現到其實日本車有好多車款係香港代理無入到既,就例如一講起,個個都會話代理一入就即刻比錢去買既Suzuki Swift Sport啦,好適合香港路窄,泊車位細既K car銷量之王Honda N-Box 咁。呢D都係小編當時買車時既考慮,但係無行貨,好多車友們都會卻步,因為大家都有個迷思,究竟買水貨車番香港,會唔會出唔到牌架?會唔會好貴架?小編近排就買入左人生第一部車,仲要係日本買番黎既二手水貨車,希望分享下比大家聽買水貨車既經驗

(小U:鼓掌!!>0<~~~)

日本二手水貨車點搵車盤

首先,同大家分享一下小編買車既流程先。由於小編係經平行進口商係日本拍賣場投得小編既愛車,而唔同既平行進口商(香港真係有好多平行進口商)所收既費用同買車既流程都唔同,所以大家買水貨車既流程可能同小編既流程有出入,希望大家參考一下。

進入正題啦,進口車商多數喺從日本行二手車業用的著名USS平台上面BID車,而USS賬戶並唔喺公開比普通市民申請。所以就要依賴有的進口商會export咗D車盤出黎。

日本水貨車搜索

可以搵盤慢慢揀,但留意拍賣日期,過咗就冇

(搵車平台可向代理商查詢,例如有http://crauc.com/auction 或 https://www.jp-c.com/auction/(免費註冊就可用)。但呢兩個平台多數只有顯示“起拍價”,如果想搵翻心儀的“市場價”,可以去“日本的28car”,例如:https://www.carsensor.net/usedcar/

日本二手車查價

日本二手車平台“goo”為例

 

日本二手車盤質素要點揀

搵完心儀車款後,就係拍賣場搵盤(上述截圖),而呢d盤都會有一張分紙比大家參考。小編認為呢張分紙非常之有用,因為係除左睇相之後就見唔到實物既情況下,呢張分紙係提供左好多資訊!

日本二手車分紙

日本二手車分紙粗略解釋

買二手車大家最擔心應該係有無花或者痕,而分紙上面係會提及既。因為小編識少少日文,所以就想分享一下幾個重要既字眼。「キズ」係日文係傷痕既意思,而「汚レ」係解污漬,「リペア跡」就係解維修痕跡。如果係分紙上面見到有圈住「キズ」同「汚レ」,並唔代表架車唔好,而係日本檢查員真係好細微既痕跡都會圈出黎,最重要都係睇分紙上既分數。但係如果有「リペア跡」既話,大家就要小心啦,唔知會唔會撞過車!

講到分紙既分數,一般分紙都係以6分為滿分。6分通常都係新車,又或者外觀保養得好好而且咪數好少既車。而4-5分既車一般都係外觀有好輕微既污漬或者花痕,咪數相對上較高(通常係2萬咪至6萬咪車)。小編買入既係4.5分車,外觀上保養得好好,只係內籠有少少污漬,咪數就係7萬幾咪。小編認為如果唔係完美主義者,而且budget唔係太多既車友,可以由4-5分既車入手。而分紙既左下角手寫既一堆日文,主要係寫左咩位置有污漬花痕,又或者有咩改裝左都會寫。小編認為唔識日文既,盡量揀番4.5分或以上既車,質素抵玩又唔會多古靈精怪野!

分紙最主要睇右上角既分數, 內外裝評級

分紙最主要睇右上角既分數, 內外裝評級

補充:教睇分紙的網上資料 –

  • http://crauc.com/files/how_to_read_as_cn.pdf
  • http://car.bidinone.com/hk/index.php/Public/auctionsheet
  • http://optionmotors.com.hk/pages/—%E8%AA%8D%E8%AD%98%E6%97%A5%E6%9C%AC%E6%B0%B4%E8%B2%A8%E8%BB%8A%E5%88%86%E7%B4%99.html

 

揀中咗之後就希望可BID中

揀好左車盤,平行進口商會分享番佢地之前買入呢款車既大約價錢係幾多,大家可以因應自己budget 調節心目中既最高落bid價,溝通好就交給進口商代理實時操盤,可能好好彩可以以低價入到心頭好,唔中既就再揀過盤,再試下投標!補充:日本USS聲稱喺全球最高效率的電子化二手車平台,流轉得好快,所以一定喺要提前訂好心水價,唔可能一路bid一路溝通:

日本二手車拍賣市場USS

日本二手車拍賣市場USS現場實況

當然,係你決定投標價時,要比按金比平行進口商先啦,按金係視拍賣車價而定既,由一萬至三、四萬不等。係投得到車之後,按金係會扣除手續費同運費既(具體收費唔同車行有唔同)。運到車番到香港之後,會安排1)驗廢氣,2)海關打稅,3)驗車前更換法例要求既零件如玻璃及安全帶label (因為日本車比較多係後座兩旁及車尾使用黑玻璃,而香港係唔容許),4)驗車。之後就係同買行貨車一樣,去保險公司出cover note,去運輸署出牌,就可以揸出街啦!而小編由成功投得車到出牌係用左兩個半月時間,呢個時間都視車款而唔同既,如果咁好彩你款車係香港第一個引入,時間會更長!

 

BID日本車價錢BREAKDOWN

係呢到,為左方便讀者了解價錢,小編就用自己架車做個小break down:

  1. 車價:800,000yen
  2. 運費:170,000yen (因港口及車重會有所不同)
  3. 手續費:1萬港幣(用作扣除文件等費用)
  4. 換後座及車尾玻璃:5,500港幣
  5. 香港海關打稅:約4萬港幣
  6. 總數:約13萬港幣

而其他仲有驗車、驗廢氣等等,平行進口商會以真報實銷形式收取,有單有據。最後小編夾夾埋埋用左大約13萬港幣買入左保養良好既2016出產二手水貨車。入過想了解翻代理車商的詳情和優惠位,請留言PM,本文只分享個人經驗。

車友們睇到呢到,可能會覺得小編比咁多錢都只係買架二手車番黎,好唔抵。不過香港可以買既車款,其實真係唔多,邊個唔想Honda代理入架Civic 番黎?買車既錢唔係細數目,大家都想揸到心頭好,既然都係要比筆錢出黎,當然要揀架最好最靚既,而日本人保養車真係保養得好好,相比香港,要係二手市場搵架保養得一樣咁靚既,相信係無可能。如果車友們係香港揀唔到心頭好,不妨考慮下,買番架日本水貨車!

題圖中的日本JDM車款:

MAZDA FLAIR
MAZDA FLAIR
NISSAN DAYZ
NISSAN DAYZ
HONDA N-BOX
HONDA N-BOX
TOYOTA TANK
Mitsubishi EK X

 

小U結語

好多謝網友Buffalo的詳細分享,小U都好想見到街上有更多唔同車款,而唔會比越黎越縮的代理搞到得翻果幾款熱門車。補充小TIPS:

  • 引入的二手車車齡要7年以下
  • 港元強日元弱的時候會最抵買
  • 分紙基本上喺外觀(包括底盤外觀)的評價,機械問題、尤其喺“暗病”好難從分紙睇出有冇

如果大家對日本水貨車有任何疑問,例如點樣計稅,咩車款好玩,維修方面有咩注意等,請在本文下方留言,小U會幫大家聯絡本文作者、其引進代理行、或者有經驗的人士專門解答。想保密或者問題複雜的,也可填妥以下表格:

好希望Buffalo半年之後可以再翻黎update大家,部日本二手水貨車揸得點樣!

香港養車日誌喺屬於每位香港車主,如果你也有興趣分享你的養車心得體會,記得參與分享計劃啦!

關注香港養車日誌FACEBOOK,緊貼實用的香港養車資訊,用最少金錢獲得最大的養車樂趣!小U網販也提供高性價比的實用汽車用品。

更多相關文章供參考:

養新車還是二手車更開心?過來人發現呢一點決定了你的養車體驗

太新嫌貴,太舊驚壞:新手買二手車買幾多年車好?

 

你是否正在打算購入人生中第一部車?睇睇我們專為香港新車主編撰的“第一部車買車攻略”一定幫到手:

Related Articles

Leave a Comment